Madaxweyne Xaaf oo shaaciyey “sababta loo gubay” Bangiga Dhexe ee Soomaaliya

    Axmed Ducaale Geelle Xaaf, “madaxweynaha” maamulka Galmudug, ayaa wuxuu meesha ka saarey in dabka ka kacay Bangiga Dhexe ee Soomaaliya “uu ka dhashay koronto”.

    Saq dhexe 28-kii Janaayo 2020 ayay ahayd markii lasoo wariyey dab qabsaday qol ku yaala qeybta dambe ee Bangiga oo ku yaala degmada Shangaani ee Muqdisho.

    War-saxaafadeed kasoo baxay maamulka Bangiga ayaa lagu shaaciyey in uusan jirin khasaaro buuran oo ka dhashay dhacdadaas marka laga reebo waxyeelo soo gaarey dhismaha iyo fiilooyin.

    Bayaanka ayaa lagu tibaaxay in sababta keentay dabka ay tahay koronto, isla markaana si degdeg ah loo damiyey.

    Hase ahaatee, Xaaf ayaa rumeysan in Bangiga Dhexe “si ola kac ah” dab loo qabad-siiyey, wallow uusan shaacin cidda ka dambeysay.

    Isagoo u waramayay Barnaamijka Wicitaanka Dhageystaha ee ka baxa VOA-da, Xaaf ayaa xusay in talaabadaas loo qaadey “si loo qariyo lacago ka ku jiray Bangiga oo Galmudug lahayd”.

    Isagoo cadadka lacagta ku sheegay lix milyan oo Doolar, xukuumadda federaalka ah ayuu daaha ka rogay “in ay u adeegsatay doorashooyinka Galmudug”.

    Dhanka kale, “madaxweynaha” ayaa carabka ku dhuftay in wada-hadalo hoose ay leeyihiin hogaanka ururka Ahlu Sunna Waljameeca.

    “Dowladda Federaalka ah ee Soomaaliya ma dooneyso wada-hadalo waxay rabtaa in ay wax boobto, taasna mid aan yeelayno maahan,” ayuu hadalkiisa ku daray.

    Xaaf oo ku sugan koonfurta Gaalkacyo ayaa sameystay “baarlamaan” kuwaasoo u doortay “madaxweyne iyo ku xigeen”, wuxuuna wacad ku maray in uusan aqbali doonin natiijada coddeynta Dhuusamareeb.

    LEAVE A REPLY

    Please enter your comment!
    Please enter your name here